Big wahala don show again for Manchester United defender Harry Maguire as Greek court don uphold im conviction, six years after police arrest am for Mykonos, Greece in August 2020.
The England international, wey be 32 years old, face charges of non-serious assault, resisting arrest and attempted bribery. Court find am guilty on all three counts and give am 15 months and 20 days suspended sentence, plus €1,500 fine. That means say e no go enter prison for now.
Wetin Really Happen for Mykonos?
According to report, the incident start during Maguire holiday for Mykonos. E claim say some men inject im sister Daisy with unknown substance, and she begin lose consciousness small small. Maguire talk say e try carry her go hospital, but instead, police carry am go station.
The defender also allege say uniformed men beat am for leg and tell am say im football career don finish. Later, e allegedly try run because e fear say dem wan involve am for kidnap plot, before police catch am and keep am for custody for two nights.
Court later find am guilty of assaulting police officer, resisting arrest and attempted bribery. Police accuse am say e tell officers: “Do you know who I be?”
Appeal Still Dey Ground
Under Greek judicial process, Maguire first conviction bin cancel pending full retrial for higher court. But after several postponements, court don now uphold the conviction again.
Im legal team don confirm say dem go appeal the judgment.
Family and Friends Also Involved
Maguire brother, Joe, and im friend Christopher Sharman also face charges connected to the incident. Joe later clear for attempted bribery charge, but court still uphold aggravated assault and verbal abuse charges against am.
Both of dem deny any wrongdoing.
Maguire Still Focus on Football
Despite the court matter, Maguire no show for court physically and e still expected to feature for Manchester United match against Newcastle United.
The former Leicester City captain continue to maintain im innocence as the legal battle still dey continue.
